A'e le laau

I le amataga a la'u misiona, sa ou fiafia lava e matamata i tama samoa e a'e laau. E tau le vaai se mea faapena i amerika. a a'e le laau a se tama samoa, e foliga pei ua faigofie le mea. o lea, i le masina muamua a la'u misiona, sa ou taumafai e a'e se laau pei o se samoa. o le mea moni, e ese lava le faigata! masalo e le faigata i se isi, ao a'u, ua le taitai ona lava lo'u malosi. sa a'e teisi le laau, ona toe solosolo i lalo ao ou fusi le laau. e ese foi le tiga o lo'u fatafata ona o le lauleaga o le laau. e oo mai i lenei aso, ou te ofo i le malosi o le tama samoa moni.

O le aganuu

E tele ni tala e mafai ona tusitusi e uiga i mea sa tutupu ia te a'u e tusa ma le aoaoaina ma faaaogaina o le aganuu samoa i le taimi a la'u misiona. Ou te faamoemoe ou te maua le avanoa e faamaumau i lalo i lenei blog tala uma ou te manatua e tusa ma le aganuu. ae e iai le tasi tala ou te fia tusi i lenei taeao. pe o la'u tala muamua lenei o se mea sa tupu ia te a'u e tusa ma le aganuu ma le faiga o lauga faasamoa. sa ou nofo mo le lima masina i la'u nuu muamua o Faiaai, Savaii. Uma loa lena, na memei atu loa i le nuu o Lotofaga, Upolu. E le'i umi ae sa avea a'u ma le tasi palagi i la'u sone atoa, sa leai se isi palagi, na'o a'u ma le toasefulu tasi faifeau samoa. Sa ese lava lo'u fiafia i lena tulaga. e moi a, sa fai sina faigata isi aso, ao se avanoa lena sa foai mai e le alii. i se tasi aso sa faatonu mai le taitai sone, e tatau ona ou sauni se lauga mo se faatasiga a faifeau, o le konofesi. o le mea moni, e le'o se lauga umi sa fai, ua na'o le folafola sua. o le isi mea foi, e le'i tusia lenei lauga e a'u, ae na tusia e se isi, a'o a'u na ou tauloto lenei lauga. ae manatua sa le lelei lo'u tautala i lena vaitaimi. o lea, sa faitau aso uma la'u lauga e tauloto ai. Sa faataitai tele lena lauga ma la'u soa. Ina ua oo mai le aso e fai ai la'u lauga, sa ou lagona lava le ma'i o le manava ona o le popole tele!! Sa fai le vaega muamua a le matou fono i le taeao, ona tuua ai lea mo le taumafataga na sauni e se tasi uarota poo le au paia a le lotu. ina ua faapotopoto matou, ae le'i fai le tatalo o le mea ai, sa ou fesili i la'u taitai sone po o le a le taimi e fai ai la'u lauga. fai mai lona tali, a uma loa le tatalo, ou te tula'i loa ma fai la'u lauga. Sa faatonu mai foi ia ou fai ma le malosi lava la'u lauga, ia fai ma le leo malosi! Ina ua uma loa le tatalo, sa ou tulai loa! Sa ou vaai atu i le toatele o tagata samoa, o faifeau ae maise foi tagata a le uarota, tagata laiti atoa foi ma tagata matutua. E le mafai ona ou faamatala le malosi o le tata a lo'u fatu. Sa tata ma le fefe, ma le fiafia foi. Sa amata loa la'u lauga. Sa ou tei ia a'u lava ona o le malosi lava o lo'u leo. Sa fai le lauga atoa ma lena leo malosi, ona ou nofo loa lea i lalo. Sa filemu tagata mo se taimi puupuu lava, ua leai se leo a se tagata, ona amata loa lea ona patipati mai tagata! ou te le'i vaai muamua i se tali faapena mai tagata mo se folafola sua. Peitai, ou te talitonu sa fiafia latou e faalogo i le palagi ua taumafai ona fai se lauga faasamoa. Sa latou fiafia foi ona o le malosi o lo'u leo i le lauga. Sa ou maua lava le fiafia i lena aso!!

Faitau ma A'oa'o

Ina ua uma le fa masina muamua a la'u misiona, sa faigata pea ia te le gagana samoa. o se tasi aso, ina ua faatoa uma se konafesi mo tagata o le Ekalesia, sa ou taumafai e faamatala atu i le matou aiga le fuafuaga a ma'ua ma la'u soa. Sa le mafai ona latou malamalama mai ia te a'u. O le aso lena sa ou fiu. Sa fiu e vaai i foliga o tagata ua le mafai ona malamalama mai ia a'u. O lea sa ou foi atu i le fale ma sa amata ona faitau le tusi a mamona i le gagana samoa. e le na'o le faitau ao le faitau leo tele o le mea sa fai. o lena tusi e fai sina umi, ma sa tuai tele la'u faitau i le amataga. Peitai, sa ou faitau pea aso uma soo se taimi sa maua ai se avanoa. e na'o le lua pe tolu vaiaso na faitau ai ae uma lelei le faitauga a le tusi atoa. I le amataga a la'u faitau, sa ou le malamalama i se mea a le tusi. ina ua uma ona faitau ai, sa toeitiiti ona ou malamalama i mea uma a le tusi. e moi a sa le taitai ona atoatoa lo'u malamalama i le gagana, peitai sa sili mamao lo'u malamalama i le taimi na uma ai, i lo le taimi sa amata ai lo'u faitau. o le mea sili ona taua, sa tuu faatasi le faitau ma le tatalo. sa faigata pea ia te a'u le gagana mo la'u misiona atoa. e leo se gagana faigofie, ao se gagana ou te fiafia ai lava. sa maua foi ni avanoa i le taimi mulimuli ane i lenei tala, e aoao nisi vaega taua a le aganuu samoa ma sa fesoasoani mai le gagana ia te a'u i la'u galuega.

sasa le vao

Na ou maua lava le fiafia i le taimi atoa a la'u misona, peitai ou te mafaufau soo i le taimi sa ou nofo ai i lau nuu muamua. O le taimi lena o le taimi sili ona faigata i lou olaga atoa. Ao le mea taua e manatua, o le taimi lena foi o le fiafia sili. E le mafaamatalaina le suiga sa tupu i pou olaga i le vaitaimi lena. Ao lenei tala ou te faamatalaina i lenei aso e leo se tala a se mea faigata sa tupu, e leo foi se mea taua tele e tusa ma lou alualu i luma faaleolaga, a e nao se mea sa tupu ou te fiafia ai. I lena taimi sa fai le matou lotu i se fale samoa. Soo se taimi sa malosi ai le timu pe agi le afa, sa masani ona vave tuua le lotu ona o le pisi mai o le timu pe leaga foi le faalogo ona le pao o le timu i le apa o le fale. Ae sa amuia matou i lena taimi ona sa fai mai le lotu e maua le matou falesa fou, o se falesa sili ona manaia. Ao le galuega muamua sa tatau ona faataunuu, e sauni le fanua. Sa tofia le au lotu e faataunuu lenei vaega o le galuega. O lea sa fuafuaina se tasi aso e faapotopoto ai le au paia ma latou pelu e sasa ai le vao. Sa ese lava lou fiafia ina ua fesiligia au e le peresitene a le paranesi pe ou te fia fesoasoani i le galuega. Sa ou fiafia lavavi lenei avanoa aua sa ou fia avea ma se tama samoa moni, o lea sa ou tago loa le sapelu e fesoasoani e sasa le vao. Sa ou sulu se ie ma see ni seevae tosotoso pei o se samoa. Sa le faigofie lena galuega peitai sa ou ataata ma le fiafia le taimi atoa. Ou te manatu foi sa fiafia ai foi le au paia. E lei lelei lou tautala faasamoa i lena taimi ma sa faigata foi ia au e faamatala atu i le au paia lou alofa mo i latou. Ao le aso lena sa latou vaai ai i lou alofa tele mo i latou ma le latou paranesi.

O le Aso Kerisimasi

O le aso kerisimasi muamua i la'u misiona sa faigata tele. e na'o le 4 pe 5 vaiaso so ou iai i samoa ae oo i le kerismasi, o lea, sa tele lava le ma'imanatu sa ia te a'u i lena vaitaimi. O le taimi lena sa ou nofo ai i faiaai savaii, sa na'o le tasi telefoni i le nuu atoa. I lena taimi, e le'i iai se telefoni feaveai a se isi i savaii. ua na'o le telefoni i le fale komiti sa iai. O le telefoni lena sa ou faaaogaina e vili atu i lo'u aiga, ae sa puuupuu lava le talanoaga. Sa ou faanoanoa le aso atoa. e iai foi isi mea sa tutupu i lena aso sa ou faanoanoa ai. o lea, sa faigata lava lena aso. A'o le aso kerisimasi lona lua o la'u misiona, sa eseese lava mai le kerisimasi muamua. sa ou masani lelei i le olaga faasamoa ma sa ou fiafia ai. Sa ma soa ma se tasi alii sili ona lelei, o elder faasavalu. I le aso kerisimasi sa ma vili atu i ma aiga. Sa ou talanoa ma le tina o faasavalu, pei o lo'u lava tina o ia. Sa ma asiasi atu foi i le aiga o talai, o se aiga sili ona lelei. O le mea moni, ou te le'i toe mana'o tele e talanoa ma lo'u aiga i Amerika, ae sa ou fia mafuta ma o'u aiga i samoa! e tele lava le suiga sa iai i lena kerisimasi. Ou te manatua o flo, o se tasi afafine o talai, sa aumai ia te a'u se mea alofa mo le kerisimasi, o le mitiafu samoa. Sa sili lo'u fiafia i lena mea alofa, ona o se mea alofa mai si o'u tuafafine samoa. I lena vaitaimi, sa ou fia avea ma se samoa moni. e faigata lava ia te a'u e faamatala lagona fiafia sa oo i lo'u loto i lena vaitaimi. e le'o se tasi mea patino sa maua ai le fiafia, ao lagona uma ma mea uma sa tutupu na oo mai ai le fiafia i lo'u loto ma le mafanafana. O le vaitaimi lena o le a ou manatua ai lo'u olaga atoa ma le fiafia sa maua i lo'u olaga i lena taimi.

Pese toatasi

I la'u misiona i samoa, e tele a'u soa samoa sa maua. e na'o le lua soa palalagi sa ma soa. O la'u soa palagi muamua, e na'o le tolu vaiaso na soa ai ma'ua. a'o lena palagi, ua ese le manaia o lona leo usu pese. sa olegia soo o ia e fai pese faapitoa i le sauniga lotu. Ina ua soa ma'ua, sa mana'o le taitai misiona ia fai se pese faapitoa e la'u soa. masalo e le'i manao le taitai misiona ou te lagona le loto leaga, poo se mea faapena, aua sa fesili mai foi le taitai misiona ia te a'u ou te fai foi se pese faapitoa e pese toatasi. sa ou le manao lava e fai lenei mea. e le manaia lo'u leo usu pese, ou te le fiafia foi e usu pese i luma o isi. e le gata i lea, ae sa ou ma'i foi i le vaiaso lena, sa pe o'u taliga. i le aso sa, sa tofia ma'ua e fai ma pese, e sosoo ma se lauga. O a'u sa taitai soa, o lea, o la'u soa sa pese ma lauga muamua. uma loa la'u soa, ua sosoo ai ma a'u. Sa use muamua le pese, ona lauga ai lea. ou te iloa e le'i lelei la'u pese. peitai, ou te le'i ma ai foi. Sa faataunuu lelei la'u lauga aunoa ma se popole. a'o le mea malie, ina ua uma loa le sauniga, e toatele tagata sa o mai ia ma'ua. Sa latou fai atu ia la'u ua manaia le pese, ae fai mai ia a'u ua manaia la'u lauga. a'o se tasi alii, o se alii ou te le'i masani ai muamua, sa faatalofa mai ia a'u ma fai mai lana tala faapea, "Sole, manaia le lauga, leaga tele le pese." Uma loa lona tala, na savali ese ma ou te le'i toe feiloa'i lava ma lena alii. ua malie lava le fai mai sa'o lava o lana tala. ae ou te iloa fo'i, o le alii lena o le alii samoa. o lea ou te iloa e le'i faamasino mai foi, ae sa fai mai lana tala ma le alofa.

O se mea puupuu

e le lava le taimi i lenei taeao e fai se tala umi, pau a le mea ua ou fia tuuina atu se manatu puupuu toe faatauvaa. ou te manatua se tasi po ao ou nofo i vailele. sa na'o a'u ma ni faifeau samoa se toafitu pe toavalu. sa pau lava a'u o le tasi palagi sa iai. sa matou nonofo i se tama'i fale oo i tua o le matou fale. sa iai le matou kipoti ua tumu i le koko samoa ua faatoa uma ona palu. e le'i vevala lena po, sa agi malie le savili, ua malu toe manaia. sa talanoa matou i le faasamoa, ma sa ou lagona faapei o a'u o se samoa maoia! e ese le manaia o lena lagona. i lena aso, sa ou le toe fia sau iinei amerika. e iai le pese samoa e faapea mai, "o le olaga o samoa, e manaia tele lava!" e sao lelei lena pese. e tau leai se popole. o le tele ni mea i le olaga, ae e le manaomia foi tele mea eseese. e le taua le telefoni feaveai poo se tivi tele. e le manaomia tele le tupe poo se taavale. o le tele o mea i amerika e naunau ai tagata amerika, e le taua i samoa. e taua le va ma tagata, ma le va ma le atua. ia, o se tala puupuu lena. soifua.

O le Matai Malie

I le amataga o la'u misiona, sa ou nofo ai i le nuu manaia o Faiaai. Peita'i, e le na'o Faiaai na talai ai. Sa tala'i mai Faiaai sei oo ia Taga. E tele tele lena eria. Ia, o se tasi aso, sa ma faalogo ai ua le toe fiafia le pule nuu o Fogasavaii i lana faifeau. Ma te le'i iloa foi, o le matai lena sa papatisoina i le lotu mamona i aso ia ua leva tele ona mavae atu. O le matai lena sa fai lana tonu na te fia toe auauna atu i le lotu mamona. ae tasi lava le pona i lenei matai, ua ova lava lona fiafia e inu pia. e faasa lava le inu pia i le lotu mamona. O lenei matai, sa le tuu lava lona inu pia, e ui ina ua foi i le lotu mamona, ua inu pea. peitai, sa fesoasoani mai tele i le galuega faafaifeau talai. Sa faaaoga lana taavale aso sa uma e momoli ai tagata o le uarota i le fale sa. Sa fesoasoani mai foi ia te maua e amata lesona ma lona atalii ma lona toalua. sa fesoasoani mai tele, ao inu pea le pia! soo se taimi lava sa o atu ai maua i lona maota, sa ona tele! o lona ona e toeitiiti ua le mafai ai ona tautala! ua mafai ona fua lona fiafia mai ia te a'u e tusa ma lona ona. a faapea ua ona laitiiti, ua feololo mai foi lona fiafia. ae a faapea ua ona tele, ua tele lava lona fiafia mai ia te a'u! soo se taimi sa alu atu ai i lona maota ae ua ona tele, e valaau mai leo tele a, "Malo Holla!!" Sa le mafai ona ta'u lo'u igoa atoa, o Holladay. ae na'o le "holla" ua fai mai. Sa masani ona tula'i le alii e faafeiloai ia ma'ua i luma o le fale, ae sa tau le mafai ona tula'i! a'o taimi uma lava sa faalia mai e lenei alii le fiafia ma le alofa. e tele taimi sa momoli ai ma'ua i lana taavale. sa aumaia foi le mea ai ma isi upu fautuaga mo le olaga. ou te le iloa pe ola pea lenei alii, ae ou te alofa tele ia te ia ma lona agaga fiafia ae maise foi le agaga alofa sa faalia mai.

Tautala FaaSamoa

I le amataga o la'u misiona, sa faigata lava ia te a'u le gagana samoa. Sa ou fefe fo'i e talanoa ma se isi, ne'i ou faia so'u tala sese. O lea, ou te le'i tautala tele. o le mea moni e faigata lava e a'o se gagana pe a le faataitai. Ae ou te manatua se tasi aso taua tele i le la'u a'oga o le gagana samoa. O se aso lata i le aso kerisimasi, sa fesili mai le tama o le matou aiga pe ma te fia o ma la'u soa i le maumaga e sui povi. ou te le'i malamalama i le uiga o le "sui povi" ae sa ou fiafia lava mo se avanoa e malaga atu i le faatoaga. ou te manatua sa mamao lava le mea sa laalaa ai matou. Ina ua matou taunuu atu i le faatoaga, sa amata loa le timu. sa matou faatopetope atu i se tamai fale oo o iai i ina. sa nofonofo matou ao faatali ia toe laofie. Sa amata loa ona talanoa matou. Sa matou talanoa i mataupu o le talalelei. Sa faigofie feololo ia te a'u e talanoa i mataupu o le talalelei, aua pau o upu sa ou malamalama ai o upu e faatatau i le lotu. E le'i umi ae ua amata ona talanoa i isi mataupu, a'o le vavega, sa ou talanoa pea ma i la'ua. Sa ou fesili atu tele faapea, "o le a le upu faasamoa mo...." ma sa fesoasoani mai la'u soa, ona ua malamalama feololo la'u soa i le gagana faapalagi. Sa la ula mai ia te a'u ua fai mai ou te mau oa aua ou te sau mai amerika. sa ou fia fai atu e le mau tupe tagata uma i amerika, e iai le toatele o tagata matitiva. peitai, ou te le'i iloa le upu mativa. ou te manatua manino lava, a'o matou toe savali atu i le fale, ao timu pea le mea, sa ou fesili atu i la'u soa po o le a le upu faasamoa mo poor. O lea sa tali mai la'u soa. ou te manatua pea o le aso lena sa ou aoao ai le upu o mativa. I lena aso, sa amata ai ona ou maua le loto tele e talanoa ai faasamoa. e moi a sa umi pea ona le lelei lo'u tautala, peita'i, o le aso lena sa tupu ai le tamai vavega, sa tuuina mai e le alii le loto malosi e talanoa ai faasamoa. Ina ua ou toe taunuu atu i le fale, sa iai nisi sa tautala mai faapalagi, ae sa ou musu e tali atu faapalagi, sa ou fia talanoa faasamoa!!

O le Fale Taele

e pei ona ou fai atu muamua, o tala uma ou te faia i lenei blog e le faagasolo lelei ma le taimi o la'u misiona, vagana o nei tala muamua, ou te fia tuuina atu nei tala e tusa ma le faasologa o aso i le amataga o la'u misiona. O lea, o lenei tala sa tupu i le aso lona lua sa ou nofo ai i Faiaai. Sa ou ala i le taeao i le vaveao, e pei o le mea masani mo se faifeau mamona. Sa ou te'i ina ua iloa atu ua leai ni puipui a le fale. Sa ou manatua loa, ou te nofo i se fale oo. I le aso muamua ane, ou te le'i vaaia i se fale taele. o lea na ou fesili atu i la'u soa po ofea le fale ou te taele ai, aua e eseese le fale oo ma le fale palagi. o le fale palagi e iai le potu faapitoa mo le taele o i totonu lava o le fale. ao le fale oo, o le mea fou ia te a'u i lena taimi, e leai lava se potu, e leai foi se fale uila poo se fale taele i totonu ai. O le pogai lea na ala ai ina ou fesili atu i la'u soa po ofea le mea ou te taele ai! Sa tali mai la'u soa ma te o atu faatasi i le fale o le aiga matou te nonofo faatasi ai, e faaaoga le latou paipa. Ioe, sa leai se fale taele ae na'o le paipa, o le olaga manaia lena o Savaii! Peita'i, o a'u o le palagi, ou te le'i malamalama foi pe faapefea ona ou sui lo'u ofu! Ona ua leai ni puipui a le fale, e vaai mai tagata uma! Sa faamatala mai la'u soa le ala e sui ai lo'u ofu ma le ie. E tago le ie a'o talai ese le ofu, ona fusi faalelei ai lea le ie, e nao le ie e fai ao taele. o lea sa ou sui lo'u ofu i le ie ma ua tautau le solo taele i lo'u ua. I lena aso ou te le'i iloaga o a'u o le palagi muamua lava e nofo i lena nuu faatasi ma lena aiga. po o le mafuaaga lena sa matamata mai tagata uma lava ia te a'u ina ua ou savali atu i le paipa, o tamaiti atoa foi ma tagata matutua o le aiga. Masalo sa ofo i latou i le paepae o lo'u pa'u ua faapea latou e pei a'u o se aitu! Ina ua taunuu atu i le paipa, ua faatoa ou malamalama ai e taele i fafo i se paipa! Ina o ou taele, sa matamata mai tamaiti, o nisi foi o i latou sa fia talanoa mai ia ma'ua, ao ma te taele! e le faia se mea faapena i amerika. A'o samoa, e mafai, ona ua aiga i matou. O le aso lena ua leva ona mavae. A'o le aso lena o se manatu oloo tumau lava i lo'u mafaufau e le mafai lava ona galo. E le nao se mea ou te manatua, a'o se mea ou te manatua manino lava e pei o se ata tifaga i lo'u mafaufau e mafai ona ou matamata ai. Ou te manatua tagata i le fale kuka, ou te manatua foi tamaiti sa sauni mo le aoga. Ou te manatua foi puaa ma maile ua taa i le fanua o le aiga. Ou te manatua le manogi sa sasala mai le fale kuka ao latou sauni le malu o le taeao. O lena vaetaimi sa faigata lava ao nei ua na'o se mea suamalie lava i lo'u mafaufau. E moni lava sa faigata lena vaetaimi ia te a'u ona sa ou le masani i le olaga samoa, ae ou te iloa foi sa faigata lena taimi foi mo la'u soa ma le matou aiga, ona sa le masani foi i latou i faigata o le tausiga a se palagi. Peita'i, sa faia le latou galuega ma le onosa'i tele, e leai lava se taimi sa faaali mai le ita ia te a'u. Sa alofa mai latou e tutusa ma le alofa tunoa a le alii. I lena nuu, sa ou aoao lava le uiga moni o le alofa. O aiga uma sa faaali mai le alofa ia te a'u. E mafua mai i latou lo'u alofa mo tagata samoa uma! E mafua mai foi i latou lo'u malamalama i le alofa sa mafai ai ona ou aoao atu i tagata e uiga i le alofa mai o le faaola!

O la'u nuu muamua

O le nuu muamua lava sa ou nofo ai i Samoa o le nuu o Faiaai, Savaii. O le mafuaaga lea sa momoli atu ai a'u i le uafu e le alii lapao lena sa faamatalaina le isi aso. Sa ou fiafia lava mo le valaauga e amata la'u misiona i savaii, ona sa tele ni tala sa faalogo ai muamua e uiga i le motu lena. Ina ua ou taunuu atu muamua i Savaii, ou te manatua sa ese lava lo'u vaai i le nuu. Faapei ua ou siitia i tua i le taimi i aso ua leva ona mavae. Sa matou fetaui i le uafu ma se alii faifeau matua lava, o ia sa momoli matou i matou nuu muamua. O lenei alii, ua ese lava lona aveave lemu o le taavale. Ae le'i amata lena malaga, ou te le'i iloa o le mamao i tua o Faiaai. Ua alu alu a le taavale mo se taimi ua umi lava. Ina ua iu ina ou taunuu atu, e le mafaamatalaina lo'u te'i lava i le vaai i la'u fale muamua ou te nofo ai. Sa ou vaai atu i se fale oo moni lava! Sa ese lava lo'u fiafia aua e le nofo se amerika i se mea faapena. Ina ua te'a le sefulu pe sefulu lima minute, ina ua uma ona tuu la'u ato i le fale ma vaai faalelei i le fale, sa uma loa lo'u fiafia, ae ua liu atu lo'u fiafia i le popole. e le nofo se amerika i se mea faapena!! sa ou manatu ifo, po o fea lava le fale ese ma le fale taele?! ao ou nofo i le fale ma mafaufau i lenei suiga fou i lo'u olaga, na sau se tasi o taimiti o le aiga ma sa fai lana tala i la'u soa ma te o atu e fai le mea tatau ai. ou te le'i malamalama i le tala o le tamaitiiti ao la'u soa o le samoa mai tutuila. sa faamatala mai la'u soa e tatau ona ma o atu i le fale e fai le mea ai. O le mea ai o le puaa ma le ulu. o le taimi muamua lava lena sa ou vaai ai i se ulu, poo le puaa foi faapena. o taumafataga uma lava sa fai i lena nuu, sa nofo ai faatai. o lea o le taimi muamua lena sa ou nofo faatai mo se taimi umi faapena. e le'i atoa se lima minute ae matua tiga ai lava o'u vae. Ina ua uma le mea ai, sa talanoa ai pea la'u soa ma le aiga. sa taumafai le aiga e talanoa mai ia te a'u, ae sa ou faataga ou te le iloa ua latou talanoa mai ia te a'u. ina ua atoa le lua itula poo se mea faapena, sa ma foi atu i le ma fale e fai sina malologa. e moi la'u tala, e le'i atoa poo se tolu sefulu minute ae toe sau le tamaitiiti e tasi ma toe fai mai lana tala ma te o atu e fai le mea ai!! ia, o le a ou tusitusi foi isi tala e tusa ma o'u aso muamua i savaii ma le faigata o le olaga mo a'u, ae pau a le mea ou te fia fai atu ai taimi nei, sa avea na aso ma se tofotofoga sili ona faigata mo a'u. peitai, o le taimi foi lena sa avea ai ma se faamanuiaga aua sa ou liu atu i le alii mo le malosi sa manaomia lava i lena taimi faigata a lo'u olaga. sa tuuina mai e le alii le malosi sa ou manaomia, ma sa iu ina ou fiafia tele i la'u fale oo lena, ma le olaga faasamoa i savaii.

O le Amataga

O lenei blog e le tusitusi tala uma e tusa ma le faasologa o la'u taimi i Samoa, a'o lenei tala, sa tupu foi i le amataga a la'u misiona e pei o la'u tala muamua. Ina ua ou taunuu atu i Samoa, mo aso muamua e lua sa nonofo pea le matou au malaga i le fale a le matou au faifeau talai i le nuu o pesega tala ane i le malumalu a le lotu Mamona. I nei aso e lua, sa fai matou aoga ina ia matou sauni atili mo le galuega. I le aso lona tolu, sa fai ai le matou fono e faasilasila mai e le matou taitai le nuu muamua lava matou te nonofo ai. O le tele o tagata i le matou au malaga sa latou nonofo pea i nisi nuu i Upolu. A'o toatolu i matou sa malaga atu i le motu matagofie o Savaii. O la'u malaga atu mai pesega i le uafu i Mulifanua, sa avetaafale se tasi o faifeau talai. E lua mea ou te manatua ai e tusa ma lenei faifeau. O le tasi, ua lapoa lava o ia. O le isi mea, ua ova lava le faasausaua a lana aveave! Sa ou popole lava faapea ou te oti lava! ao matou agai atu i le uafu, sa afe i se tamai fale oloa e faatau ai sina mea ai. Manatua, i lenei taimi, sa tau le malamalama i se faasamoa. ae sa fesili mai se tasi faifeau faapea, "You hungry?" Sa ou manatu ifo loa ua faatoa uma ona faia le matou malu o le taeao, ae ua toe fia aai nei faifeau! I le aso lena, ou te le'i malamalama e fiafia lava tagata samoa e fafaga faifeau. o lea, a oo i le faaiuga o le misiona, e matua'i fia ai taimi uma se faifeau aua o le mea lena e masani ai. O a'u lava, sa amata la'u misiona i le 155 pouna. ao i le faaiuga o la'u misiona, sa ou sili atu i le 195 pouna! ia, o la'u tali i le faifeau lena, e leai, ou te le fia ai. Ae fai mai loa le faifeau, sei ta o i totonu. Ina ua ou savali i fafo mai lena fale oloa, sa tumu lava o'u lima i mea ai, o le sanuisi, chips, fagu inu, aisakulimi ma isi foi ni mea ai! pe o se avanoa lelei mo a'u e faamasani lava i le olaga faasamoa. O le isi mea foi, ou te le'i faatauina lava se mea ai. O mea ai uma lea sa faatauina e se isi. O se tasi faailoga na o le aganuu faasamoa. i le lumanai, o le a ou tuuina atu foi se isi tala e tusa ma le faatauina o mea ai ma le taua o le alofa atu ia isi. po olea le malosi o lo'u alofa mo tagata samoa, e sili atu latou alofa mai ia te a'u. e faapena o latou loto, e malosi lava le alofa mo soo se isi!

O le Malae Vaalele

O ananafi sa fai ai la'u tala e uiga i la'u taunuu atu i Samoa mo le taimi muamua. O le tala lena ua faaautu i le malae vaalele, o lea, ou te fia tuuina atu se isi tala e tusa foi ma le malae vaalele. I le tausaga 2009, sa ou toe malaga atu ai i Samoa mo se tafaoga mo le lua vaiaso. muamua sa ou malaga atu i Kalefonia mai le setete ou te nofo ai taimi nei o Florida. Ina ua ou taunuu atu i L.A., Kalefonia, sa ou fetaui ma se tasi teine samoa e pei o so'u tuafafine. Sa fesili mai lona aiga pe mafai ona ou avatu se "tama'i mea" i samoa mo le tama o lenei teine. Ou te malamalama i le aganuu samoa, o lea sa ou malie e avatu se mea mo i latou. Sa tatau ona ou malamalama, a fai mai se samoa e avatu se tamai mea, masalo e le'o se mea laitiiti! ia, na aumaia ia te se laulau piliati! e moi a o le laulau o se tamai laulau piliati, peitai, ua fai sina tele pea le mea. Peita'i, ou te alofa i lenei aiga, o lea na ou ave le laulau i samoa. Ina ua ou taunuu atu i le malae vaalele i samoa, sa fesili mai se tasi o sekulati poo leoleo po o le a le mea o iai i totonu o pusa. sa ou tali atu o le laulau piliati. fesili mai loa le alii poo le laulau lea a a'u. sa ou tali atu leai, ao le laulau a se isi. sa amata loa ona tatala le pusa e le leoleo, aua ua fai mai masalo e iai se mea faasaina ua nana i totonu. ao faia lana mea lena, sa fesili mai o ia, po o ai le tagata ou te avatu ai le laulau ma ou tali atu o le alii lelei e nofo i le nuu o moataa. ae fesili mai loa po o ai le alii? ou te tali atu o Talai. ia, sa ataata mai loa le alii ma le fiafia, ma e le'i toe tatalaina le pusa. sa fai mai loa ia te a'u, na te masani lelei ia talai ma na te iloa foi o talai o se tagata lelei, e manaomia e tatala le pusa. sa toe tuu mai loa ia te a'u le pusa, ma sa ulufale loa i totonu. e malie foi lenei tala, aua e le mafai ona tupu se mea faapenei i amerika, e pei o la'u tala sa fai ananafi. ou te ofo ua masani le leoleo ma le alii mai moataa o le ou te masani ai foi! e faapena lava samoa!

O le aso muamua

Ou te manatua manino lava la'u aso muamua sa taunuu atu ai i samoa! Sa taunuu atu i le malae vaalele o Faleolo i le taeao po i se taimi pe o le lua. O se au faigaluega sa atatu ni sitepu i luga o iuli e ifo ai tagata mai le vaalele. e eseese lava lenei mea i le mea o iai i amerika. ua leai se terminal poo se isi mea faapena, na'o ni sitepu lava. Ina ua ou alu i fafo mai le vaalele, e ui ina po le mea, ou te ofo lava i le susu o le ea. Sa ou manatu o la'u tau ma le ea i fafo ua tusa ma le tau o le ulu i se pa sima! ua malosi lava le susu o le ea i Samoa! Ina ua oo i totonu o le fale, sa tau atu muamua i le mea e siaki ai le tusi folau ma isi pepa malaga. Sa fiu tagata e tutu, sa iu ina fai mai se tasi e faigaluega iina, ua iai le faafitauli ma le komipiuta. o lea, ua faasilasila mai, e le siaki muamua pepa, ae matou te o muamua i totonu e piki a matou ato. e le mafai lava ona tupu se mea faapea i amerika! ao le mea tonu lena ou te fiafia ai i samoa, o le faifai malie mea uma. maimau pe ana tutusa uma le lalolagi ma tagata samoa. masalo ua le toe iai tele ni fafitauli. ua le toe tele ni fusuaga ma solitulafono leaga. e moi, e tupu foi nei mea i samoa, ae e le tele! e malosi lava le alofa ma le fiafia o tagata. i lo'u lava olaga, ou te taumafai lava ia faatutusa lo'u olaga ma le ola faasamoa. soo se taimi e le lava ai lo'u onosai, ou te toe mafaufau ifo ai i le aga o le samoa. O le aso muamua i le atunuu o samoa, sa avea ai ma se amataga lelei lava mo la'u misiona.

O Manatu Muamua e uiga i lenei Blog

Ia, ae ou te le'i tuuina atu so'u taofi vale, e muamua lava ona sii le viiga ma le faafetai i lo tatou tapaau o le lagi ona o le avanoa matagofie lenei tatou te faafesootai ai i luga o lenei blog.
Ia, ou te fia tuuina atu sina faamatalaga puupuu ia a'u nei. O a'u o le palagi, o le mafuaaga lena ua le atoatoa ona lelei la'u tusitusi faasamoa. O lea ou te fia faamalie atu i soo se isi e faitau ai lenei blog, a faapea e sasi se mea, ia alofa ma faamagalo mai faamolemole.
Sa amataina la'u aoaoaina o le gagana Samoa ina ua sefulu iva tausaga o lo'u ola. Sa aoao mo le lua masina i Utah, ona sa o atu ai lea i le atunuu o Samoa e aoao ai atili le gagana ma talai atu le talalelei a Iesu Keriso.
I lenei blog, Ou te fia tuuina ni tala e uiga i mea taua sa tutupu mai ae maise foi nisi o tala malie atoa foi ma ni vavega foi na tutupu i le faataunuuina o le galuega a le Alii. Ou te le tusitusi aso uma i lenei blog, ae na'o i taimi ou te mafaufau ai i se mea taua e faatatau i lenei blog. e faamatalaina uma nei tala i le gagana samoa, o lea faamolemole, ia onosai mai!